திருவிளக்கு வழிபாடு

                                   திருவிளக்கு வழிபாடு 

விளக்கே திருவிளக்கே: வேந்தன் உடன்பிறப்பே

சோதி மணிவிளக்கே: சீதேவி பொன்மணியே

அந்தி விளக்கே: அலங்கார நாயகியே

காந்தி விளக்கே: காமாக்ஷித் தாயாரே

பசும்பொன் விளக்குவைத்துப் பஞ்சுத் திரிபோட்டுக்

குளம்போல எண்ணெய் விட்டுக் கோலமுடன் ஏற்றி வைத்தேன்

ஏற்றினேன் நெய்விளக்கு: எந்தன் குடிவிளக்கு

வைத்தேன் திருவிளக்கு: மாளிகையும் தான் விளங்க

மாளிகையில் சோதியுள்ள மாதாவைக் கண்டு மகிழ்ந்தேன் யான்

மாங்கல்யப் பிச்சை மடிப்பிச்சை தாரும் அம்மா

சந்தானப் பிச்சையுடன் தனங்களும் தாரும் அம்மா

பெட்டி நிறையப் பூஷனங்கள் தாரும் அம்மா

பட்டி நிறையப் பால் பசுவைத் தாரும் அம்மா

கொட்டகை நிறையக் குதிரைகளைத் தாரும் அம்மா

புகழுடம்பைத் தாரும் அம்மா: பக்கத்தில் நில்லும் அம்மா

அல்லும் பகலும் எந்தன் அண்டையிலே நில்லும் அம்மா

சேவித்து எழுந்திருந்தேன்: தேவி வடிவம் கண்டேன்

வச்சிரக் கிரீடம் கண்டேன்: வைடூரிய மேனி கண்டேன்

முத்துக் கொண்டை கண்டேன்: முழுப்பச்சைமாலை கண்டேன்

உரிமுடி கண்டேன்: தாழைமடல் சூடக் கண்டேன்

பின்னழகு கண்டேன்: பிறை போல நெற்றி கண்டேன்

சாந்துடன் நெற்றி கண்டேன்: தாயார் வடிவம் கண்டேன்

கமலத் திருமுகத்தில் கஸ்தூரிப் பொட்டுக் கண்டேன்

மார்பில் பதக்கம் மின்ன மாலையசையக் கண்டேன்

கைவளையல் கலகலென்னக் கணியாழி மின்னக் கண்டேன்

தங்க ஒட்டியாணம் தகதகென ஜொலிக்கக் கண்டேன்

காலில் சிலம்பு கண்டேன்: காலாழி பீலி கண்டேன்

மங்கள நாயகியை மனங்குளிரக் கண்டு மகிழ்ந்தேன் அடியாள் நான்

அன்னையே அருந்துணையே: அருகிருந்து காரும் அம்மா

வந்த வினை அகற்றி மகாபாக்கியம் தாரும் அம்மா

தாயாகும் உந்தன் தாளடியில் சரணம் என்றேன்

மாதாவே உந்தன் மலரடியில் நான் பணிந்தேன்:

சரணம் சரணம் தாள் பணிந்தேன் உனை

பாவம் பொறுத்துப் பல பவுசும் தான் கொடுத்து

விக்கினங்கள் வராமல் வேலிபோல் காத்து

ஆதரித்து எனக்கு அருள்புரிவாயே

புவன சுந்தரி போற்றி வணக்கம்

குரு வடிவாய் வந்து உபதேசங்கள்

கொடுத்து உன் திருவடி தந்து அருள்வாயே.