ஜாதகத்தில் உச்சம் பெறும் அனைத்து கிரகங்களும் நன்மையை செய்யுமா

 

ஜாதகத்தில் உச்சம் பெறும் அனைத்து கிரகங்களும் நன்மையை செய்யுமா:

உச்சம் பெறும் ஒரு கிரகம் அதன் காரகத்துவத்தை வலிமையாக தரும், உச்சம் பெரும் ஒரு கிரகம் நன்மையை மட்டுமே தரும் என்பது தவறு. ஒவ்வொரு கிரகத்திற்கும் தனித்தனியே காரகத்துவங்கள் ஆனது கொடுக்கப்பட்டுள்ளது..

இதில் நல்ல காரகத்துவங்கள் கொண்ட கிரகங்கள் உச்சம் பெறும் பொழுது, அதன் நல்ல காரகத்துவங்கள் ஆனது ஜாதகருக்கு கிடைக்கும். இதுவே தீய காரகத்துவங்களை கொண்ட கிரகம் உச்சம் பெறும் பொழுது அந்த கிரகத்தின் தீய காரகத்துவங்கள் ஆனது அதிகமாக வெளிப்படும்.

கிரகங்கள் உச்சம் பெறும் ராசி மற்றும் பாகை அளவு

சூரியன் மேஷத்தில் 10 டிகிரியில் உச்சம் பெறும்.

சந்திரன் ரிஷப ராசியில் மூன்று டிகிரியில் உச்சம் பெறும்.

செவ்வாய் மகர ராசியில் 28 டிகிரியில் உச்சம் பெறும்.

புதன் கன்னியில் 15 டிகிரியில் உச்சம் பெறும்.

குரு கடக ராசியில் 5 டிகிரியில் உச்சம் பெறும்.

சுக்கிரன் மீன ராசியில் 27 டிகிரியில் உச்சம் பெறும்

சனி துலா ராசியில் 20 டிகிரியில் உச்சம் பெறும்.

மேலே கொடுக்கப்பட்டுள்ளது கிரகங்கள் ராசியில் அடையும் பரம உச்ச பாகை அளவுகள் ஆகும்.

அதேபோல ஒரு கிரகம் உச்ச ராசியில் இருப்பதாலேயே அது உச்சம் பெற்ற கிரகம் என்று எடுத்துக் கொள்ளக்கூடாது. இதில் பாகை அளவினை சரியாக பார்க்க வேண்டும். உதாரணமாக கடகத்தில் ஐந்து டிகிரியில் குரு பரம உச்ச நிலையினை அடைவார், ஐந்து டிகிரியை குரு விலகி கடந்து செல்லும் நிலையில் அது நட்பு ராசியில் வலிமையாக உள்ளதாகவே எடுத்துக் கொள்ள வேண்டும்.

கிரகங்களுக்கென காரகத்துவங்கள் எப்படி கொடுக்கப்பட்டு உள்ளதோ அதேபோல கிரகங்களுக்கு உண்டான தனி ராசிகளும் கொடுக்கப்பட்டுள்ளன. இங்கு ஒன்பது கிரகங்களில் ஏழு கிரகங்களுக்கு மட்டுமே தனி தனி ராசி வீடுகள் ஆனது உள்ளது. ராகு, கேதுகளுக்கு சொந்த வீடுகள் கிடையாது.

அதேபோல 7 கிரகங்களில் சூரியன் மற்றும் சந்திரனை, தவிர மற்ற ஐந்து கிரகங்களுக்கும் இரண்டு ராசிகள் ஆனது அமைந்துள்ளது.

இப்பொழுது விஷயத்திற்கு வருவோம் மேலே கூறியவாறு ஒவ்வொரு கிரகத்திறகும் தனி காரகத்துவங்களும் தனி வீடுகளும் கொடுக்கப்பட்டுள்ளன. ஒரு ஜாதகத்தில் ஒரு லக்னத்திற்கு இந்த கிரகங்கள் நட்பு கிரகமா அல்லது எதிரி கிரகமா, மேலும் இவை அந்த லக்னத்திற்கு வாங்கிய ஆதிபத்தியங்கள் என்பது மிகவும் முக்கியம்.

உச்சம் பெறும் அந்த கிரகமானது லக்னத்திற்கு நட்பு கிரகமாக மட்டுமல்லாமல், அவை நல்ல காரகத்துவங்களை கொண்டுள்ளதா என்பதனை பார்க்க வேண்டும். லக்னத்திற்கு நட்பு கிரகமாக இருந்தாலும் பாவ கிரகங்கள் உச்சம் பெறுவது அதன் காரகத்துவத்தை அதிக படியாக வெளிப்படுத்தும்.

உதாரணமாக மகர லக்னத்திற்கு சனி லக்னாதிபதியாகவே இருந்தாலும் பத்தாம் பாவகத்தில் உச்சம் எனும் நிலையை பெறும் பொழுது சனியின் காரகத்துவங்கள் ஆனது ஜாதகர் இடத்தில் பிரதிபலிக்கும்.

அதேபோல மேஷ லக்னத்திற்கு செவ்வாய் லக்னாதிபதியாக இருந்து பத்தாம் பாவகத்தில் உச்சம் பெறுவது செவ்வாயின் காரகத்துவமான அவசர குணம், முன் யோசனை இல்லாமல் செயல்படுவது, முரட்டுத்தனம் போன்ற குணங்கள் ஆனது ஜாதகர் இடத்தில் பிரதிபலிக்கும்.

மேலும் பத்தில் உச்சம் பெறும் செவ்வாய் நான்காம் பார்வையாக லக்னத்தை பார்க்கும் பொழுது, மேல் சொன்ன குணங்கள் ஜாதகர் இடத்தில் அதிகப்படியாக வெளிப்படும், அதேபோல லக்னாதிபதியாகவே இருந்தாலும் ஒரு பாவ கிரகம் லக்னத்தை பார்ப்பது லக்னாதிபத்தியத்தை கெடுக்கவே செய்யும்.

அதேபோன்று கன்னி லக்னத்திற்கு சனி ஆனவர் பூர்வ புண்ணிய ஸ்தானமான ஐந்தாம் பாவத்திற்கும், கடன், நோய், எதிரியை தரக்கூடிய ஆறாம் பாவத்திற்கும் அதிபதியாக வருவார். இந்த சனி ஆனவர் லக்னாதிபதிக்கு நட்பு கிரகமாக இருந்தாலும் இவர் இரண்டாம் பாகத்தில் உச்சம் எனும் நிலையை பெறும் பொழுது இரண்டாம் பாவகமான தனம், குடும்பம் சார்ந்தவற்றை கெடுப்பது மட்டுமல்லாமல் தன் தசா காலத்தில் ஆறாம் பாவகத்திற்கு உண்டான கெடு பலன்கள இந்த லக்னத்திற்கு செய்தே தீருவார்.

ஒரு இயற்கை சுப கிரகமானது உச்சம் எனும் நிலையை பெறுவது அதன் சுப காரவத்துவங்களை வலுப்படுத்தும். குருவானவர் ஜாதகத்தில் உச்சம் எனும் நிலைய பெறும் பொழுது தனம், மதிப்பு, மரியாதை, குழந்தை பேரு, போன்ற அனைத்து காரகத்துவங்களையும் தருவார்.

அதேபோல சுக்கிரன் ஆனவர் உச்சம் பெரும் நிலையில் ஆடம்பரம், சொகுசு வாழ்க்கை ,நல்ல மனைவி சுகம்போகங்களை அனுபவித்தல் போன்ற தன் காரகரீதியான நன்மைகளை ஜாதகருக்கு தருவார்.

அப்பொழுது இயற்கை சுப கிரகங்கள் உச்சம் பெறுவது நன்மை என்று எடுத்துக் கொள்ளக் கூடாது. நான் முன்னதாக கூறியது போல் சுப கிரகங்கள் உச்சம் பெறுவது அதன் காரணத்துவங்களை வலிமையாக தரும், ஆனால் அவை பெறும் ஆதிபத்தியங்களை கவனமாக பார்க்க வேண்டும்.

சுப கிரகம் தீய ஆதிபத்தியத்தை கொண்டிருக்கும் நிலையில் அவை தன் ஆதிபத்தியத்திற்கு மறைந்து உச்சம் பெறுவது நன்மையை தரும்.

உதாரணமாக தன் எதிரியான சுக்கிரனின் ரிஷப லக்னத்திற்கு எட்டாம் அதிபதியாக வரும் குரு எட்டாம் ஆதிபத்தியத்திற்கு எட்டில் மறைந்து உச்சம் பெறுவது பாவத்தொடர்பினை பெறாதவரையில் நன்மையை தரும். இதே சுக்கிரனின் லக்னமான துலா லக்னத்திற்கு ஆறாம் அதிபதியான குரு தன் ஆறாம் ஆதிபத்தியத்திற்கு திரிகோணத்தில் உச்சம் பெறும் நிலை நன்மையை தராது, மேலும் இங்கு உச்சம் பெறும் குரு தன் ஒன்பதாம் பார்வையால் ஆறாம் வீட்டை பார்த்து பலப்படுத்துவார்.

இதுவே தன் நட்பு கிரகமான சந்திரனின் கடக லக்னத்திற்கு ஆறாம் அதிபதியாக வரும் குரு லக்னத்தில் பங்கமற்று சுபநிலையுடன் உச்சம் பெறுவது அல்லது பாவ கிரக தொடர்பினை பெற்று பாவத்தன்மை அடைந்து உச்சம் பெறுவதும் நன்மை அல்ல. இங்கு கடக லக்னத்திற்கு ராஜ யோகாதிபதியான தனக்கும் நட்பு கிரகமான நீச செவ்வாயுடன் இருக்கும் நிலையில் தன் உச்சவலு குறைந்து சில நன்மையை தரும்.

அதேபோல குருவின் லக்னமான மீனத்திற்கு எட்டாம் பாவகத்திற்கு அதிபதியாக வரும் சுக்கிரன், எட்டாம் பாவத்திற்கு ஆறில் மறைந்து லக்னத்தில் உச்சம் பெறுவது பாவத்தொடர்பினை பெறாத வகை சில நிலைகளில் நன்மையை தரும். இதுவே தனுசு லக்னத்திற்கு ஆறாம் அதிபதி நான்காம் பாவகத்தில் உச்சம் மற்றும் திக்பலம் எனும் நிலையை பெறுவது நன்மையை தராது.

எனவே ஒரு இயற்கை சுப கிரகம் லக்னத்திற்கு நன்மையை தரக்கூடிய ஆதிபத்தியங்கள் பெற்றிருக்கும் நிலையில் அவை உச்சம் பெறுவது நல்ல பலன்களைத் தரும். இதுவே இயற்கை சுப கிரகம் பாவ ஆதிபத்தியம் பெற்று இருக்கும் நிலையில் தன் தீய ஆதிபத்தியத்திற்கு மறைந்து உச்சம் பெறுவது நன்மையை தரும். ஏனெனில் இயற்கை சுப கிரகங்கள் உச்சம் பெறுவது அதன் சுப காரகத்துவங்கள் வாழ்நாள் முழுவதும் கிடைக்கும்.

இதுவே ஒரு இயற்கை பாவ கிரகம் லக்னத்திற்கு தீய ஆதிபத்தியம் பெற்று வரும் பொழுது அவை உச்சம் பெறுவது மிக கடுமையான தீய பலன்களை தரும்.இதுவே ஒரு இயற்கை பாவ கிரகமானது லக்ன சுப கிரகமாகவே இருந்தாலும் அவை உச்சம் பெறாமல் இருப்பதே நன்மையை தரும். ஏனெனில் ஒரு இயற்கை பாவ கிரகம் உச்சம் பெறும் நிலையில் அதன் காரகத்துவங்கள் ஆனது வாழ்நாள் முழுவதும் பிரதிபலிக்கும்.

அதேபோல இயற்கை பாவ கிரகம் லக்ன சுப கிரகமாக வந்து அவை உச்சம் பெற்றால் அந்த இயற்கை பாவ கிரகம் வக்ரமடைந்து சுப கிரகங்களின் தொடர்பினை பெறும் பொழுது நல்ல பலனை தரும்.

எனவே ஒரு கிரகம் உச்சம் பெறுவதாலேயே நல்ல பலன்களை தருவதில்லை. உச்சம் பெறும் கிரகமானது இயற்கை பாவ கிரகமா அல்லது இயற்கை சுப கிரகமா மேலும் அவை அந்த ஜாதகத்தில் லக்னத்திற்கு நட்பு கிரகமா அல்லது எதிரி கிரகமா மற்றும் அவை அந்த லக்னத்திற்கு பெற்றுள்ள ஆதி பத்தியமானது சுப ஆதிபத்தியமா பாவ ஆதிபத்தியமா மற்றும் அந்த கிரகம் பெற்றுள்ள சுபத்தன்மை மற்றும் பாவத்தன்மை இவைகளைப் பொறுத்து பலன்களானது கிடைக்கும்.